الفنانة ياسمين غيث كادت تموت بسبب الحزن على هيثم أحمد زكي

كشفت الفنانة الشابة ياسمين غيث عن نجاتها من الموت جراء "نوبة خوف" تتشابه أعراضها مع آلام الأزمات القلبية الحادة، بعد الحزن على رحيل زميلها الفنان هيثم أحمد زكي، وأكدت أنها لجأت إلى المستشفى لتدارك الأزمة سريعا وخضعت بالفعل للتنفس الصناعي وتم حقنها بالمهدئات تحت إشراف فريق طبي، وقالت أن هيثم لم يجد من ينقذه من الموت بسبب الوحدة.
ياسمين غيث نشرت صورة لها من داخل المستشفى عبر حسابها الشخصي على موقع إنستقرام وروت قصة أزمتها الصحية كاملة لتحذير متابعيها من خطورة كتم الحزن أو تجاهل الأعراض الأولى للأزمات القلبية وقالت: أنا كويسة الحمد لله.. بس الحقيقة إن أنا النهاردة الصبح كنت حرفيًا بموت، صحيت على خبر وفاة هيثم أحمد زكي اللي أثر فيا ووجعلي قلبي قوي من غير ما عرفه زي غالبًا مصر كلها.. وأجبرت نفسي علي النوم تاني علشان مافكرش، وكانت دي النتيجة.. صحيت على وجع في صدري رهيب، وجع ناحية قلبي وفضل يزيد جامد قوي وضربات قلبي تعلي وتنزل في لحظة و قلت خلاص دي غالبًا يا جلطة يا heart attack في الطريق.

أضافت: كنت لوحدي في البيت.. وركزوا معايا في "لوحدي" دي، لحسن حظي كانت صحبتي جاية تاخدني وننزل، طلعت لي لقتني بموت حرفيًا و بقول لها "خوديني المستشفي حالًا أنا بيجيلي heart attack"، روحنا علي المستشفى ودخلنا الطوارئ وبدأوا الدكاترة يعملولي رسم قلب علي ضغط و سكر و كل الكلام ده.. النتيجة "كله طبيعي" وأنا بصرخ من الوجع وذراعي بينمل وبعيط وبفتكر كل اللي حصل لي في حياتي و بقول لهم "والنبي أنا خايفة، أنا مش عايزة أموت دلوقتي مش عايزة أسيب ابني".

تابعت قائلة: طلع عندي "panic attack" يعني " نوبة خوف" إدوني مهدآت لغاية ما نمت و الدكتور قال لي إنتي متوترة من حاجة و دة اللي عمل فيكي كدة، لازم تهدي و تريحي....(و طبعًا لأني من وقت تعبي بقيت بترعب و بخاف أكتر من زمان بكتير فالخوف كان الضعف)......و الحمد لله جت بسيطة و ربنا ستر عليا... بس بجد الإحساس كان مميت.

وقالت: بدأت أتخيل الغلبان ده "هيثم" اللي ممكن يكون حصل له حاجة شبه كده بس كان لوحده فمالاقاش اللي ينقذه و يوديه المستشفي و بدأت أفكر إن تاني ربنا بيحاول يوعظنا كلنا بحد محبوب من كل الناس.
واختتمت تحذيرها قائلة: الوحدة وحشة قوي يا جماعة، كفاية نحكم على بعض من بعيد لبعيد، كفاية بعد و جفاء، كفاية كلام علي بعض، كفاية تشكيك في بعض، كفاية تناكة و قرف، كفاية كفاية......الدنيا بتخلص في لحظة و يا رب ما تخلصش بينا واحنا لوحدنا، ربنا يرحمك يا هيثم و يرحمنا جميعاً!!!
يذكر أنه تم إعلان وفاة الفنان هيثم أحمد زكي يوم الخميس وقررت عائلة الفقيد تشييع جثمانه من مسجد مصطفى محمود ، كما تقرر إقامة مراسم العزاء اليوم السبت في مسجد الشرطة بالشيخ زايد عقب صلاة المغرب.