الهوملس .. أمريكي متعرب

اتعثرت علی رصيف امريكي  لقيت حالي خابطة علی هوملس بس والله رغم أنه جحرني بس كان لطيف ما ضرب .. اطلعت حولي .. لقيت عم بمشي خلسه حتی ما اكون أساس إزعاج للرصيف.. وحتی ما أكون مزعجه للهوملس .. ولأني عربيه فلسطينية مأصله صار عندي فضول داخلي لدرجة صرت احكي مع حالي هدول البشر أصلهم امريكان والا كوكتيل من هالعالم الواسع.

لقيت حالي قاعدة بعيد عم بطلع عليهم وسرحت لعالم ثاني.. اتخيلت أصل الامريكان بالهوملس .. أصلهم القديم... بدأ عالم الخيال عندي بالبنطلون والبلوزة والبوت والطاقيه والحنان وشعر الجدولة  .. اتذكرت هوايتي المعتاده بالبحث عن التاريخ القديم.. اتذكرت لبس الطاقية مع الجزمه والقميص والبنطلون .. قلت يااااااااه .. والله أميركا اتطورت.

بعدها أرجعت ادقق فيهم لقيت بعضهم ماسكين كتب وعم بقرأوا بعالم بعيد عن هذا العالم .. والله حسدتهم واتمنيت انه لو عندي وقت بحياتي ولو 3 ساعات مبرمجه اروح ع مكتبة وبس وظيفتي اقرأ الكتب واطلع علی عالم هالكون بأوسعه واسحب جيل الشباب واعلمهم حب القراءة .. وبعدها اتذكرت كيف كان العالم العربي بقوة حضارته الاقتصادية وكيف كانت أميركا مفقودة وحامله شعب هوملسي .. بعدها اطلعت للحاضر لقيت العالم يا الله اتطور واتشقلب وحمل حضارة الماضي بس الحلو انه في ناس عم يعبروا عن تاريخهم رافضين عالم الحضارة والاحلی من هيك انه عددهم كبير أخ يا هوملس.. نيالكم .. واتذكرت العرب كيف عم نتحضر بأنه نفقد كل ما نملكه من العروبة وحب الأرض والكرامة وهوية الوجود..

بعدها لقيت حالي متخربطه ..صرت اعكس الأمور .. اتذكرت شعب الديمقراطية بأميركا وكيف بذلت جهدها مشان العرب بالعراق وفلسطين وباقي الشعوب العربية بأنها اتطورنا ويصير عنا ديمقراطية.. وكيف تبنينا دول ع أساس حقوق الإنسان بعدها اتذكرت الهوملس وقلت .. يا ولي ...كان بدها اتخلي شعوبنا متطورة مثل الهوملسيه ماهي اكيد حضارتها بشعب فاقد للبيت والأسرة والاستقرار وبلا وعي .. بعيش مع السكر والمخدرات .. بعدين قلت يا بنت بلا هبل اكيد عندهم احتياط من شعبهم لبسوهم بدل وعلموهم الاتكيت وحفظوهم الثقافه وعلموهم الأخلاق وقالولهم انطلقوا في شعوب هبله بتستقبل ما بترسل ...

طلعوا الهوملس والله اهون .. بعدها اطلعت علی هوملس و هوملسه لقيتهم بضحكوا لبعض وبقولوا هاي .. وحكوا واختفوا .. بعدها رجعوا لكل واحد لموقعه .. قلت والله حلوه هاي بكره الاقي عربنا حالهم انمسخ... والله شكله العرب رح يتحول حالهم بس لعالم الاختفاء ...اوف ولك الهوملس هو شعب أصلي ولازم اصالته يتعلمها العرب .. اكيد ما بحتاجوا لجولات باميركا لأنه تاعون البدل رح يعلموهم حرية الرأي والتعبير والجسد وحرية الانسان بس بالخفاء حرام مشان ما يصير عندهم صراع داخلي وتتخربط نفسيتهم واين الصح.

بعدين اتخيلت جيش من الهوملس حاملين سلاح الكتب والمخدرات واللباس الشعبي واللغة الخاصة فيهم وخيمهم واغراضهم المعيشية مع اللحي والشعر الطويل والرائحة الزكية ( لا تصدقوني) وراجعين علی العالم العربي .. قلت يا لهوي هي ناقصة ما حنا عرب لا علم ولا ثقافة... بس عنا قدرة علی اللبس والتظاهر يعني علی الأقل عنا وجاهة شكلية .. بعدين قلت يا بنت قومي بلاش هالجيش الهوملسي يبدأ فيك .. واحملي رواية رقعة الشطرنج وشطرجي مع مخك بجوز الي مثلي يصير بكرة بس بدون بدلات و وجاهة جزء مسيطر وصانع قرار  ... يعني هوملسي عربي