"أه بنت وبسافر وهسافر"

أي بنت "مش كل البنات طبعا بس في الغالب" أول لما تيجي تفكر تسافر في المجتمع بتاعنا بيقابلها معوقات كتير بتصعب القرار والمهمة عليها وطبعا الولد مش بيتعرض لمعظمها.

زي مثلا موافقة الأهل، نظرة المجتمع، الخوف وعدم الجرأة، توفر المبلغ المالي المطلوب للسفر، وأخيرا تعطيلها عن المهمة الرسمية في حياتها، وهي البحث عن العريس اللي هتسافر معاه، ومن المفترض إنه هيحققلها كل أحلامها.

أول حاجة طبعا لازم تكوني عارفاها هي أنت عايزة إيه وتكوني واخدة قرارك، وعارفة كويس إنت عايزة تعملي إيه، وتسافري ليه؛ لأن السفر مش مجرد إنك بتروحي بلدان تانية تتفرجي على بلد جديدة، كان ممكن تشوفيها في التليفزيون، ولكن السفر هينمي شخصيتك وهيخليكي تكتشفي نفسك أكتر، وبيوسع مجال تفكيرك وهتتعرفي على ثقافات مختلفة، وفعلا ليه أكتر من 7 فوائد.

أهلك مش هيوافقوا لأسباب كتير زي مثلًا إنهم خايفين عليكي، وطبعا لازم يفهموا ويقتنعوا إن البنت اللي بتمشي في مصر وحدها ممكن تمشي في أي مكان، وإن فيه بلاد الخطر فيها منعدم، وأخطر حاجه ممكن تحصل إنها تتسرق علشان كده تاخدي بالك إنك تشيلي الفلوس وأي حاجة مهمة في شنطة صغيرة تقدري تخبيها جوة ملابسك أو بأي طريقة تانية تشوفيها مناسبة، اقنعيهم وجيبي صحابك اللي سافروا يتكلموا معاهم ويفهموهم.

في أهل كتير هيقولولك لما تتجوزي هتسافري، أه ممكن تسافري بس مش الأماكن اللي أنت عايزاها، وكمان التجربة هتبقى مختلفة تماما في وجود الزوج أو طبعا الأطفال (في سيدات بتسافر وحدها بعد الزواج بس ده بيحتاج، أنها تتخطى معوقات أكتر، وكمان زوج متفاهم).

كمان من أسباب فشل زيجات كتير من وجهة نظري طريقة التربية اللي بتخلي البنت منتظرة الزوج، وكأنه فارس الأحلام اللي هيحققلها كل حاجة نفسها فيها وهيسفرها العالم. لازم تعرفي إن ده مش هيحصل لأن بيبقى في مسؤوليات وحاجات كتير تمنع توفر الفلوس والوقت اللازم علشان كده متستنيش الزوج اللي جاي على حصان أبيض اللي هيحققلك كل أحلامك، ولو ليكي أي أحلام حققيها بنفسك ولنفسك.

تاني وبقولها في كل مقالاتي السفر مش مكلف ومش صعب، ولو مش عارفة تسافري علشان الفيزا (مع أنها سهلة لو ورقك مظبوط) في أماكن كتير مش محتاجة فيزا زي جنوب إفريقيا أو ماليزيا أو جورجيا، مثلا رخيصة جدًا وفيها طبيعة خلابة.

طبعا في بنات كتير بتخاف من نظرة المجتمع للبنت اللي بتسافر لوحدها أو مع أصحابها، هل لأن في نظرهم البنت اللي مفيش حد بيراقبها أكيد هتعمل حاجة غلط، وهل المفروض إنك تعيشي محبوسة و"متغلفة" وممنوع تتعرضي لأي حاجة خطيرة أو حرية علشان في نظرهم تبقي إنسانة كويسة؟، بالعكس البنت المحترمة والكويسة بتبقى محترمة في جميع الظروف، مش علشان متعرضتش لأي موقف في حياتها أو خدت حريتها، وده في نظري زي فكرة "ختان الأنثى" لمنعها من الخطأ.

كمان أنت ممكن تكوني صورة كويسة للناس برة كأنك سفيرة لبلدك أو دينك أيا كانت ديانتك، وده كمان لوحده كافي إنه يكون هدفك من السفر. في ناس هتقولك مش هتلاقي حد يتجوزك علشان بتسافري لوحدك، ده قرارك أنت، هل أنت عايزة تتجوزي واحد بالعقلية دي؟.

سافري لأي هدف، ممكن علشان تتعلمي وتجربي تقدمي في جامعات برة، أو علشان تفهمي الدنيا أكتر أو حتى علشان تتبسطي وبس، ده حقك!.

أيا كان حلمك أتمنى إنك تحققيه، وأي حلم بيبدأ بخطوة صغيرة، المهم إنك تاخديها، قربي من الناس الإيجابية اللي بتقولك ينفع وليه لأ. ومتخليش خوفك يبقى هو اللي بيمنعك من استمتاعك بالحياة. ومفيش معارضة بين إنك تكوني مبسوطة وإنسانة كويسة.

أنت حرة.. سافري

وأتمنى ليكي رحلة سعيدة.. رحلتك في الحياة وأي رحلات أخرى.. ولمعلومات أكثر عن رحلاتي وسفري زور صفحتي.

عن الوطن المصرية