بالفلسطيني المشربح روسيا لا حِس ولا خبر

يا جماعة الخير يا افاضل يا اجاويد، قديش بينحكي كثير وقليل بالسياسة، وبالحرب، وبنحكي عن ترامب وشطحاته ونزواته ونزقه وفنونه وجنونه،

لكن يا جماعة ، استفقدنا روسيا، ولا إلها حِس ولا خبر، ساكتة وما مبيّنه لا على شاشة الرادار ولا على شاشة النت، وكأن العم بوتين في اجازة طويلة، حتى عن الكلام،

معقول إنّه تفاهم مع ترامب على حل مشكلة اوكرانيا على السّكيت، خاصة بعد ما دقّ ترامب بخنّاق زيلنسكي في البيت الابيض!!!، وبهدلُه وقل قيمتُه ومسح الارض فيه!!!،

يعني كُلّ يلّي بيصير من مذابح وابادة جماعية في قطاع غزة، وكل خطط ومشاريع التهجير من ترامب ونتنياهو، وروسيا ساكته، ولا بيطلّ ولا بيهلّ حتى بيان، أو بتطلّ براسها وتقول يا جماعة "انا هون"، ابدا ابدا، ما بينسمع إلها ولا نفس،

يا تُرى شو السيرة، شو السالوفة، شو إلّي جرى، يا تُرى ومين درى؟؟؟!!!،

حتى كلّ يلّي بيصير في سوريا، ومفروض ما زالت في الحميميم وجوارها، شو اسرائيل بتقصف وبتدمر وبتحتل، وروسيا عاملة اذن من طين واذن من عجين، وتركيا بتتهيّأ تا تبلعلها منطقة تدمر، ووسيا ولا تعليق ولا كلمة، لا حق ولا باطل،

والله يا جماعة باين الامور مقلقة مع هالروس هذول يلّي مفروض انهم اصدقاءنا من زمان، لا بوتين مبيّن ولا لافروف بيطل، ولا حتى هذه صبيّتهم الشقرا الحلوة زاخارافا ما عادت تظهر عالتلفزيون وتغرّد،

الامريكان ميكلين الاجواء، ترامب صوته بيلعلعلع طول الوقت، بلطجة وجشع وغطرسة وبدّو يبلع العالم، عينك عينك، ومندوبينه ومستشاريه "بينعفوا نعف"، ويتكوف ووالترز، والست هذه إلّي بيبعثوها علبنان، الصبية الحلوة مورغان اورتاس، تهدد وتتمختر وتتأمّر،

يعني معقول إنه الدُّب القطبي الروسي انزوى في البيات الشتوي، وترك الساحة لهالملاعين الامريكان!!!.