بلد عايشة ع نكشة: شيك راجع! - فيديو

بحكولك المصالحة قريبة وعن طريق أفكار جديدة طخ (حسبي الله ونعم الوكيل)، وبتقلك الحكومة "الدين العام والمحلي والخارجي تراجع" مزبووووط، الحكومة بطلت تِدّيّن كتير، فش حاجة، عندها استراتيجية مخيفة، ليش تدين؟ وليش حتى تستورد (بجوز بتعرفش إنه الاستيراد المباشر من الخارج بزيد الايرادات)؟ ما اسرائيل جنبنا؟ لهيك زاد الاستيراد منها، وهيك بخف الدين العام، وبتوفر الحكومة شحن وتخليص (هيك بتفكر!)، واسرائيل أولى بلحم ثورها..

بس انخفاض الدين ونسبة العجز في الموازنة حلوين عفكرة، بس الاقتصاد بدو انعاش، عم نموووت، نسيتوا الدين الخاص؟ يعني الناس المساخيط عايشة عالشيكات الراجعة، ولكم فيه شيكات راجعة قيمتها فوق المليااار دولار وكمشة ملايين، كانت ع زمن فياض قريب ال690 مليون دولار (الله يسهله علّمنا عالقروض وعالقرووود)، بس كتييير طلعت بعده!

والحكومة بتقلك الاقتصاد في نمو، اقتصاد المعرفة والبطيخ، وتراجُع الدين العام، التسهيلات والحوافز... مصطلحات غريبة عجيبة، وزارة الاقتصاد بتقلكم: اعملوا مشاريع يا مساخيط وهاي ذقني اذا عرفتوا تكملوا مشروع واحد؟؟؟ ع قرض ودين وشيكات، والمواطنين صاروا أنواع: ناس عندها فوبيا من سيرة الشيك، وفيه تجار بترجف لأنه الشيك اذا رجع ممكن يندفع ع مدى عشرين سنة: شيكل ينطح شيكل...

ولكم مليار دولار شيكات راجعة، وسلطة النقد الي مهمتها المحافظة على الاستقرار المالي للبلد، حلّتها وشددت الاجراءات على الشيكات الراجعة، يعني هيك بتبطل ترجع؟ ولكم الاردن والامارات نسبة الشيكات الراجعة فيها يادوب 1% أو 3% بس نحن وصلت 8%... الناس بتهرب من القروض والفوائد البنكية الي بتتغير من غير ما نعرف، وصارت تكتب شيكااات، كشيلنا شو بدها تعمل عقوبات سلطة النقد (الحزين معوش يدفع.. وفي الغالب مش نصّاب)، ولكم في سنة وحدة زادت قيمة الشيكات فوق الـ300 مليون دولارررر. (2016-2017)

وهلكيت عندي نصيحتين: للحكومة بقول ديري بالك من الشيكات الراجعة لأنه بخلي الناس تبطل تفكر وتدور في الشوارع (مش ناقصنا آفات اجتماعية)، وبدي أنصح المنكوشين من افراد شعبي المنفوشين: سيبوكم من الشيكات، والبهرجة الفاضية، اه بهرجة لما تديَّن عشان شغلات مش مقاسك.

بس بتعرفوا خطرلي فكرة: ليش أعمل فيديوهات! شو جايني من هالشغلة! بدي أحررها يعني والا أنظف البلد!!! في شغلة بتعمل عجقة عنجد، احسن شي تكتبوا شيك، لأنه الشيك بتجيّر من واحد لواحد لوحدة ولواحد (تغلبش حالك وتصرفه حوله ع ديونك هون وهناك) المهم هيك عالشيك بتصير حافظ اسم: بثينة حمدان، وبعدين بيجي حدا يسألها: وين سامع باسمك!! تنفخيش حالك: لأنه أكيد ع شيك... واذا كان راجع بيلتموااا.. وانشهرتي !!!!!!

في الك شيك راجع؟ تزعلش باليوم فيه 2600 شيك راجع وفوق 600 ألف تصنيفهم نزل وصاروا عالبلاك ليست... بس خايفة أكتب شيك يرجع شي تاني: الحكومة مثلاً!