بلد عايشة ع نكشة: فَكْعَت معي!

بتقدروا تقولوا إنها زي البطيخة، الشاري بدو اياها حلوة، وبتشرّط يرجّعها إزا طلعت عِجرة. والبياع بحلف مية يمين وبدق ع صدره وبقول: هاي حلوة وع ضمانتي! بين البايع والشاري يفتح الله. بس واضح انه التنين مش عارفين وين الله حاططهم..

هيك المفاجآت السياسية.. زي البطيخة ومش معروف وين قرعتها!!! المهم.... في الزمانات واحد من هالسياسيين اخترع مقوولة: "مفاجأة سيُعلنها الرئيس في الاجتماع الفلاني.."، والشاطر منا بصير يحلل، ما انتوا عارفين البلد مختبر... هيك القصة بلّشت لحد ما سكّر المختبر وبطل حدا حابب يتفاجأ، كل شيء زي البطيخة، وحتى لو أخدنا عينة منها، وعرفنا المفاجأة منضل مسرسَبين مِن الي جاي! ومرات بتعلن القيادة عن مفاجأة للرئيس قريباً، وهاي وجه الضيف! ومنضل فاتحين ثمامنا للذُبان.. وطبعاً هاي بتكون احلا المفاجآت.. (بالناقص!)

حتى المعارضة من كتر ما دمها حامي صارت تحب تْبورد وتاكل بطيخ؛ يعني لما بدهم الناس يفكروا بشغلة، بخترعوا خبر وبقولوا إنه الرئيس رح يفاجئنا ويعلن كزا وكزا.. مرات بتكون مصادرهم صح، ومرات "فشنك" وغالباً مْقاهرَة وبس!

وآخر المفاجآت لما الرئيس حكى إنه بِعرَف قاتل عرفات بس شهادته مجروحة! آه تفاجأنا لأنه مش رح يكون إلنا عين نتهم اسرائيل بعد هالتلميحات؟؟؟ (بس حدا يحكيلي ليش شهادته مجروحة!!!)..

وتفاجئنا لما الرئيس قال إنه وقع اتفاقية سيداو الي بتمنع التمييز ضد المرأة، وكأنه انحلّت مشاكلها، مع إنه القوانين مكانك سر، (طنيب على ولاياك يا ريس فِكنا من هالاتفاقية، اصلاً وجهها شؤم.. وقع قانون هالعقوبات ورح نبوس ايدينا وجه وقفا!)

تفاجأنا لما الرئيس رِجِع فتح موضوع مشاركته في عزا بيريس!! (الله يحرق ام هالشعب، منستاهل الله لا يقيمنا... نحن بس شغل فتاوي ووطنيات وزعرنات) الرئيس تنازل وراح عالعزا عشانا، ونحن مش عاجبنا! وَلْكُم يِكسَب حب واحترام سبعين رئيس دولة –مافي منهم رئيس عربي- والا يكسب الخمس ملايين فلسطيني مسخمَط؟؟؟؟ (جد صحاب العقول في راحة!!!)

تفاجأنا لما الرئيس حكى عن طموحه يشوف فلسطين منورة بالطاقة الشمسية (مع إنها منورة بوجوده) بس بدي أعرف مين مانعه؟؟؟

لهيك أنا بحكي للقيادة والنكاشين هون وهناك... ياريت لا تحكولنا إنه رح يكون فيه مفاجآات، وسيبوا الرئيس يفاجئنا وخلص: مثلاً يفاجئنا ويشوف موضوع المرأة الي بدهم يعدموها في غزة لأنها قتلت زوجها، شكلها مظلومة والمحاكمة مش مزبوطة والحكم بستاهل تخفيف. يعني مش قادر عالمصالحة، اعمل شيء للصبايا.. بلكي سامحناك، (بلكي بس مش أكيد)!!!

وبدنا يفاجئنا ويطلع قرار زي ما هو ممنوع معايدات المسؤولين في الجرايد ممنوع المشاركة في العزيات (خلوا الي في القلب بالقلب!) وممنوع المباركة للوالدات (لأنه الولادات كتيرة وبتزيد في المناسبات والتلجات ومش ناقصة مصاريف!)......

أما "المفاجأة الأم"، بدنا الرئيس يحُط نائب إله، نائب لهالبلد، بس ياريت يكون من أولها بدون حصانة، عشان اذا تزعرن ما يرفعوا الحصانة عنه؟؟ هيني حذرت وقولوا بثينة ما قالت...

تابعوا سلسلة النكش عالهاشتاج # بلد_عايشة_ع_نكشة