بلد عايشة ع نكشة: منحب نضايق بعض!

منقدرش نشوف حدا مبسوط ونسكت! حدا عايش تحدي يطلع من حالته النفسية أو اعاقته.. ونسكت!معقووول!  لازم ننكد عليهم، ونفتي ونحكي حتى عن اثنين بحبوا بعض: كله مناظر، بتلاقيهم متذبحين في البيت، مساكين...؟ ولكم شو خصكم!

نعم؛ نحن دراسات عليا في النكد وتعليم الاحباط.. نحن مننقل الاحباط بدون دواء ولا تطعيم..

- شاب زي الورد على كرسي متحرك.. منضل نتطلع فيه ونتحزون عليه وهو شايفنا ونظراتنا مضايقته وشفقتنا مش محتاجها لأنه عايش حياته وماشي .. داحلة معه والله داحلة.. سيبوا الزلمة في حاله، وياريت منحس ومنطالب بتطوير الطرق والمباني عشانه مثلاً.. بس للبكبكة!!!

- هديك اليوم وانا في عيادة بستنى دوري دخلت صبية حلوة على عكازة، لقطوها مجموعة من القاعدين وضلوا يطلعوا ع رجلها، لدرجة اني انتبهت انه رجلها اليمين فيها شيء، اقسم بالله قززوها من نظراتهم والوتوتة الفاضية..... رغم شكلها الحلو وثقتها العالية -لو محلها بحرم أطلع؟ هيك بترتاحوا! حلوا عنها!! (النكد في الوريد)

- في عيلة الأم مرضت فيها مرض بالاعصاب والعظام وصارت حركتها صعبة، وكان لازم تطلع تمشي بمساعدة جهاز.. صارت حديث الحارة، نظرات الحزن ملاحقتها... طبعا المرأة بالموت لوافقت تطلع من البيت بهالشكل، خوف من نظرات الناس يحسسوها انها مش طبيعية ومسكينة. (والحقيقة انهم هم مش طبيعيين!!)

خبرة في تحسيس الأخر انه اقل، بس الناقصين هم الي بيحكوا.. والمشكلة انه السبب هو خلقي أو حادث يعني مش بإيدهم... بكون الواحد بقصة بصير بقصتين!! حتى اذا انكسرت رجلك، متل ما صار مع هالصبية بسبب حادث سير، وبعد علاجات صارت تمشي ع عكازات، وحبيت تغير نفسيتها وطلعت من البيت، والله لا يورجيكم، حديث الشارع، تعليقات، نظرات، واحد حزن عليها بحكيلها: ياريتني العكازة!! الله يوخذكم، طبعا ولا حدا عرض عليها المساعدة! شعب تقي محب عطوف، البنت ما صدقت تطيب عشان تخلص من نظرات الناس! الله يخزق عينهم.

هذا غير المطلق والمطلقة بكون حاسدينهم من جوا، ومن برا بحكوا عليهم، المترملين كمان ما بيسلموا، اليتيم بظلوا يذكروه انه يتيم، والغبي بذكروه بغباءه، والي بيكذب مرة، بصيروا ينادوه الكذاب (قال عشان ما يعيدها) بس بالآخر بصير كذاب.. ما هي التهمة لابسته لابسته؟ طبعا وتوبة الحرامي عنا مستحيلة. (الله بغفر بس نحن البشر لا!!)

وبعدين!! حلوا عن بعض، تحشروش حالكم في بعض، كل واحد في بيته، كل واحد يشتغل في حاله ويربي حاله أحسن، ول فش حدا معبي عينكم؟ أقسم بالله في ناس شغلتها تعيب.. وهي العيب ماليها من ساسها لراسها، مش بس ناس عاديين كمان مسؤولين، اه مسؤولين بكونوا معَبَيِّين ضد موظفين غلبانين، بعلقوا فشلهم ع موظف.. ليش اسمك مسؤول؟ ليش اسمك أب؟ ليش اسمك أم؟ نحن في زمن الي خلقته كاملة معيووووب، والي الله اخذ منه شيء موهوووب (استحوا)

شعب نكدي مش لاقي حدا يضبه... والسلام ختام