بلد عايشة ع نكشة: نويت اسيبك!

أخ ع صباح فخري لما قال: نويت اسيبك خلاص نويت... واااال من كتر ما هو قرفان لحّن الفكرة والرغبة.. بس مش أكتر مِنا، بدنا نقولها لكتيير ناس: فارقونا بريحة طيبة!! خلّونا نتطلع مثلاً عالكتل الانتخابية للبلديات ودعاياتها؛ هاي كُتلِة اسِمها رام الله تَجمَعُنا (مع إني مش عارفة كيف ووين الجَمعَة، وبأي شارع، لأنه شوارع رام الله متخانقة مع بعض، الواحد ما بيوصل مكان فيها الا بطلوع الروح وهي كلها متر في متر..) وهديك كتلة فلسطين المستقبل، واشي الوفاء والاخلاص، والوحدة والوطن... يعني أسماء رنانة بس القلوب مليانة والنفسيات حمضانة (بس حرام، ما بدي اظلم الكل، لأنه مش كل أصابعكم زي بعض، في اشي أسوأ من إشي) الله يرحمه سيدكم!

وكله كوم والمستقلين كوم ثاني (لأنهم اذا مستقلين عن فتح أو عن حماس معناها مش مستقلين... هدول شغلِتهم يتحسّروا بين هون وهناك وبين السيء والأسوأ، هدول بدهم جنازة يشبعوا فيها لَطِم... (الله يهديهم ويعرفوا شو بِدهُم وليش استقلوا وعن مين؟).

الانتخابات منيحة بس نحن الي مش مناح، وأحزابنا راكضة ورا دعايات وبالآخر مافي شُغُل في البلديات ولا في الوطنيات، بس أجت خيمة الأسرى وعملت للدعاية الانتخابية قِيمة، وتناوبوا المرشحين عالخيام (أحسن من بلاش!).

أحزابنا الحِلوة شو عملت هاي الفترة؟ "الجِهاد" بِكُل عين قوية حذّرت الفتحاوية من أي أزمة معها، خاصة بعد قِصّة خضِر عدنان في خيمة اعتصام الأسرى، تخانقوا عالكراسي والكراسي خشب وفراطة!! (طبعاً الخيمة والكراسي مش زابطين مع بعض!!) ياريت الكل يغار من "عدنان".. وسيبوا الكراسي في حالها!

شوفوا أحكيلكُم: الجهاد.. معاهم معاهم وعليهم عليهم... هي من برا جهاد ومن جوا يسار ومن فوق حماس (وكلهم مش مع اضراب الأسرى) الجهاد بتشبه البطيخة مش معروف قرعتها وين؟

أما حماس إم المقاومة وشيخة المعارضة الفلسطينية، فقّسَت قِصّتها وفرّخت، وجابت هنية ابن المخيم الي كله خجل وتواضع ولما يعمل باي بإيده (يا ويلي علينا) ولا أنغش واحد في البلد، صاحب الابتسامة الساحرة ع رأي الجزيرة (الله يسامحكم بس، غيرتوا مفهومي للابتسامات وينك يا جورج كلوني؟). أبو العبد صار بعد كم شهر "تغذية" في قطر قائد الحماميس، ومن كتر الحماس والتواضع والوطنية الي عنده قلبه ما طاوعه يشرك عناصره في اضراب الأسرى (ضريب يضربنا نحن الشعب السهتان والبهتان والغلبان... قال ابن مخيم قال ومفتول العضلات كمان؟؟؟)

لازم تعرفوا شغلة يا منكوشين وهو إنه خضر عدنان بالصدفة "جهاد" بس اسمه اهم من كتاااار، وحماس بتلعب بالبيضة والحجر طوول الوقت، وفتح ما طِلعَت بقرار الاضراب متوحدة، بس طلع! والقصة داحلة، وبتستاهل، و"الجبهة" بتِعمل مهرجانات عن الاضراب بس مش قادرة تقول لَعَناصِرها: اضربوا، بس عندها كم زلمة اضربوا وع راسهم سعداااات، وأسرى كتير بيفهموا أضربوا  من فصائل تانية بدون قرار.

احزابنا يا جماعة كلها لازم نغنيلها: نويت اسيبك مش انتخبك (شلّتونا يا..) بس الوحيد الي ما منقدر نغنيله اياها هو فخامتُه، والسبب إنه الزلمة بسافر وبيِرجَع، وما بيحكي كتيييير وسابنا نِضرِب عن الأكل وعن الكَشَل (دام عِزّك وصمتك) سيادتك منعرف انك راجع من زيارة المجنون "ترامب" وبدك فترة تِصحالنا... عم نستنتاك بخيمة الأسرى.. أشّر ع أي وحدة وما عليك، واذا بدك بأشّر عنك... أنا عارفة انك زعلان عشان عملنا يوم نفير للأسرى بيوم روحتك ع أميركا.. بس شو بدك تعمل عقلنا مش مريّحنا!!!! (الله يسترنا من انتخابات الفرااااق)

تابعوا السلسلة ع الهاشتاج #بلد_عايشة_ع_نكشة