ثقافة الكلاب وسخافة الوعي 

يا شاب يا بو الكلب، شو هالطلة وشو هالسلسة الشيك، اتمنظر يا عيني تمنظر، مهو شط البحر ناقصه تلوث، مش معيي المجاري و تحميم الحمير، ناقصهم ترهيب المصطافين.

 ايوة استعرض مع كلبك المصون، اعطيه الأوامر بالحركات والإشارات واحنا مفروض علينا نتفرج ع درس المعلم والتلميذ ، ومرة يخيب معك ومرة يصيب

بحييك ع الثقافة الكلابية العالية الي عندك، معلوماتك رهيبة عن الكلاب انواعها و ألوانها واسعارها واحجامها.ومن أسنانها بتعرف اعمارها، وموسم تكاثرها ونواتج التهجين، يا ريتك بتعرف مدنا وقرانا قبل التهجير

اسمح لي يا ابو  الشباب سؤال ع السريع : 

انت عارف انت مين؟  طيب ممكن اجاوبك أنا باختصار  انت بتكون مين؟

انت مسلم في الدين ، والكلب لا يجوز انك تقتنيه إلا للحراسة او الصيد وغير هيك حينقص من اجرك قراطين، ما  تستغرب، راجع كتاب اقتناء الكلاب في الصحيحين.

يعني انت يا ابو المنظرة حتفقد  في القيراط الواحد.متل جبال تهامة من الحسنات، كيفك وانت فاقد قراطين؟وانت اكم قراط الك من الحسنات يا مسكين

بعدين انت يا بنيي من فلسطين،  وفي ذكرى النكسة، لما ضاعت غزة والضفة وباقي القدس .. وهلقيت اليهود في ضمها لدولتهم شغالين وانت ما بتعرف ملهي بالكلب متأسفين.

يا.ابو السلسلة والكلب ، انت من غزة الي غزاها البين، فيها شباب متلك بس في ايديهم سلاسل من كبريت

اكيد يا بو الشباب وصيت بياع الجاج يخلي للكلب الرجلين، طيب وصيلك للدار يا نشمي ع جاجتين مرة اعملها ولو بالدين خلي امك ترضى عليك.

معلش اتحملني زي ما احنا متحملين بنطلونك الساحل النا سنين، عاملي النقاصة موضة بندير وجهنا عنك وبنغض العين، وبنقول الله يهديك

   واقف على المراية ٢٤ساعة تحط جل وواكس و اخر صيحات الشعر وتسريحة القنفذ عليك ووجهك كل يومين عامله بالخيط و بنقول الله يعين.

بس بصراحة هيك انت زودتها كتير ،وقتيش بدك.تحس بجرح الوطن والاقصى يا كبير

مش طالبين منك كتير بس ارحم المراهقين من.عدوى التأثير وبتكون اعملت فينا خير

 وشو رايك تتخيل انك برفقة فرس و انت الفارس النشمي الراكب عليه و بدل سلسلة الكلب يكون في ايدك لجام العز والمجد الأصيل، يا سلام. شو هالمنظر بيسر الخاطر و بيسر العين ، يا زين