رسالة من مواطن تافه !

هادي الرسالة لا عَ الفيس ولا عَ الواتس هادي الرساله عَ الفاضي

ملاهي سعادّتك المحترم

عمّي العزيز صالح

عمّي العزيز أمين

الموضوع : رسالة من مواطن تافه بسواش ولا مَلِّيم

بعد التحية ؛

وكيف الحال إن شالله تكونوا عال العال

وبخير وبكهربا ومواتير

عارف إنكو مشغولين

فينا وشغّالين

وللسّخافات والرسومات وكلام الناس والفيس بوك والشّعر والموسيقى مش فاضيين

وعارف إنّو الوقت زي كرشك يا عم صالح سمين

وإن قالوا سمين قول آمين

وعلى تركيا رايحين شهداء بالملايين

خُلاصة الكلام إحنا إزهقنا مراجيح

مَرجَحتونا عشر سنين

دُخنا وداخ الاسبيرين

من أيامك يا شيخ صالح

ومن زمان الحاج أمين

من أيام النكبة الأولى

والـ 48

والفلتان ابن الكلب ابن ستّه وستين

اشربنا كل الشعارات

والبلد عطشانه نِفسها بتلعِي

بتتوَحَّم على ضو

على بصيص أمل

بصيص عمل

على شُربة بنزين

مرجحتونا عشر سنين

دُخنا وداخ الاسبيرين

العبتوا فينا "بالفِنْجَر"

وأنا المواطن زِفت

والله لا أُنكِر

إنّو هادي الرساله عَ الفاضي

وإنّو الميّه زي السّكر

والمعبر فتح مرّة والحاجز إتسكّر عشرين

والبلد زي ما انتَ شايف

فيها حاجة حلوة

فيها صبر

فيها عنب

فيها مولات

وفيها يا مولانا

تين

وشحاتيــــن

على فكرة نسيت أنا ليش إيش موضوع الرسالة

والله حتى مع اللخمه ما جبنا سيرة رام الله

والاحتلال واسرائيل وعكّا وقلنديا وبلعين

واللد والبطارية وعاصمة فلسطين

على العموم مش موضوعنا

اسمع يا شيخ صالح

اسمع يا حاج أمين

فلسطين مش بس انتوا

فلسطين مش بس آمين

فلسطين يَحُدّها من التاريخ سنة ستّه وخمسين

لا للتوطين

والاخوان مع الشيوعيين

إفتح على جوجل

وبسيسو معين

حَتشوف إنّو يَحُدّها من الشرق مؤمنين

ومن الغرب علمانيين

ومن الشمال يساريين

ومن الجنوب موحّدين

مسلمين ومسيحيين

وصامدين

وصابرين

وعاشقين

مختصر الكلام يا صالح

احكي لاخوك امين

مرّة كتب درويش

فلسطين كانت تُسمّى فلسطين صارت استغفر الله العظيم ..