طاق طاق طاقية .. وأنا بدي هوية

أنا سيدة فلسطينية من أبوين فلسطينيين ولكني لا أحمل أي مستند يثبت أنني فلسطينية .. لا بطاقة هوية ولا جواز سفر .. وفقط شهادة ميلاد صادرة في عام 1977 في عمان تقول أنني فلسطينية باسم رولا علي خليل فودة .. وعلشان تتحقق أمنية المرحوم والدي " زيتنا في دقيقنا " رحبت أمي بالعريس الذي طرق الباب .. ابن عمي محمد عطية فودة القادم إلينا من رفح فلسطين .. وطرت من الفرح .. أخيرا سأعود إلى فلسطين بين أهلي وناسي وبين العيلة التى حفظت كل شئ عنها من والدي .. النزوح في عام النكبة من قريتنا " بشيت " قضاء الرملة .. وتفرق الإخوة ما بين في مخيمات اللجوء ما بين غزة والخليل .. ثم الاستقرار في عمان .. ورغم مرارة الهزيمة وضياع ما تبقى من فلسطين التاريخية .. إلا أن الهزيمة حققت لقاء الأشقاء وتبادل الزيارات بعد عشرين عاما من الفراق .

وجئت مع عريسي بتصريح زيارة في العام 1998 إلى غزة العائدة لسلطتها الوطنية الفلسطينية .. وبين أهلي وأبناء عمومتي استقر بي المقام في مخيم رفح للاجئين .. على هذه الأرض ستتحقق أحلامي .. الزوج و البيت والأبناء .. وأسمع كلمات زوجي : لا تقلقي يا زوجتي الحبيبة .. لم الشمل اليوم أسهل من أيام الاحتلال .. وبعد الحصول عليه ستشبعين من زيارة والدتك وإخوتك في عمان .. وما كل ما يتمنى المرء يدركه تأتي الرياح بما لا تشتهي السفن .. ابتلاني ربي بعمليات إجهاض أخرت قدوم أبنائي .. ومعها تلاشت أحلامي بضياع طلب لم الشمل بين حانا ومانا .. ستة عشر عاما كاملة من فقدان الأمل ولوعة فراق الأم والأخ الوحيد والأخوات .. حتى جوازي الأردني " أبو سنتين " رفض تجديدة بدال المرة ثلاث مرات وفي الآخر " مرفوض ما تحاولوش " وفقدت الأمل في المستند الوحيد الذي يتيح لي السفر لبيت أهلي في عمان .. الأخوات تزوجن والأخ تزوج ولم أحضر أفراح أهلي ولم أشاهد أبناء أخي وأخواتي .. بعد أن عز اللقاء .

يا ابن الحلال : اجري ورا طلب لم الشمل .. إللي قبلي وإللي بعدي أخدوه .. وابن الحلال جوزي ما خلا باب إلا طرقه وما خلا واسطة إلا حكى معاها .. وفي الآخر أجا الخبر الصاعق والمهين : مفش طلب في وزارة الشؤون المدنية !!! كيف يا ناس معانا كعب الطلب وعليه الطوابع و إشعار استلامه بتاريخ شهر 5 / 1998 .. وين راح ؟؟ أخده الغراب وطار .. والا أكلته الفيران في غرف الوزارة .. بالله عليكو هادا كلام ؟؟ .. يعني أنا اليوم لا ع البر ولا في البحر " ساقطة قيد " .. وين الملفات ؟ وين الكمبيوترات ؟؟ .. وين حقي في المواطنة ؟؟ وين حقي في الهوية ؟؟ .. كنت زمان بألعب مع بنات الحارة " طاق طاق طاقية وأنا بلا هوية " بس هادا اللعب كان في عمان .. ولما كبرت ووصلت وطني كمان بلا هوية .

جوزي الدكتور محمد فودة من أسبوعين بعت لمعالي الوزير وأجو الصحفيين وسمعوا قصتي من طقطق لسلامو عليكو .. أولها معالي الوزير في رام الله حط في هادي طينه وفي هادي عجينه .. بعدين كتب على صفحته في المدعوق الفيس بوك إنو زعلان من إثارة الموضوع .. طيب يا سيدي : إحنا آسفين وحقك علينا وأنا بدي عنب بديش أقاتل الناطور .. بأستحلفك بالله .. ثم بالغاليين عليك .. معاليك بترضى إللي حصل معاي يحصل مع بنتك والا أختك .. أنا متأكدة إنو معاليك يا أخوي أبو جهاد بتقدر تساعدني .. بعدين هادا واجبك مع شعبك .. نفسي أشوف أمي .. نفسي أشوف أخوي .. نفسي أشوف خواتي .. وأهلي نفسهم يشوفوني ويشوفوا ولادي .. يا خوي يا حسين الشيخ : أنا بدي هوية .