عيان بيشرح لميت

قال: نهاية طبيعية ومتوقعة وإن تأخرت، سيرك ترامب والنتن. فكرني بحكاية عيان بيشرح لميت لا ده فاهم ولا التانى مصدق..لم يوجد في التاريخ شخص يقف أمام العالم الذى يرقبه، و يقول أفرغوا هذا المكان من ناسه لانني اريده، سأنشيء عليه منتجعات سياحية وغيره، هذا الرجل إما مجنون عيان في دماغه..اهبل عبيط، أو يستخدم إسلوب جديد لخوض المعركة تجعل من يواجهه مرتبكا منوما، كما فعل  الزمار في جمع فيران القرية بعزف لحن معين ثم  قام بأغراقها. شوفت اد ايه انه محترف نصب وحاوى من بتوع الثلاث ورقات..!

قلت له: عندما ينتقل المهرج إلى القصر، لا يصبح ملكا ولكن القصر هو الذى يتحول إلى سيرك؛ الجيد في الأمر أن مناصري ترامب بدأوا يفهمون أنهم يدعمون شخصا معتوها يشكل خطرا يتعدى حدود الولايات المتحدة.

بين الضحك والبكاء قال: ترامب هيعمل للعرب خوتة في دماغهم، كل شوية يرزعهم تصريح أرض جو يخليهم يلفوا حوالين نفسهم، أكيد بيشتغلهم. وهم بيشتغلوا نفسهم.. وكل واحد فيهم بيشتغل بالتاني والأرزاق على الله...للأسف كلمة قاع الامم اصبحت لا تكفي للتعبير.

تفتكر ترامب مش عايز يهجّر الناس من غزة وإنه بعقلية رجل البيزنس بيعلي سقف الصفقة لأقصى حد Maximum  علشان اللي قدامه يقبل بالأقل أو يتفاوض علي الفتات؟

قلت: وارد...لكن عن نفسي لا أظن، يبدو لي أن لترامب شخصيًا أطماع خاصة في غزة، عينه عليها يعني. الراجل بيتكلم عن منتجعات وشواطئ واستثمار سياحي و...و...
قال: يعني حاليًا كل الدول شايفة إن قيام دولتين هو الحل الوحيد، وبيحاولوا بكل قوة يضغطوا في هذا الاتجاه، فينتهي الحال بالقبول بالوضع الحالي أو حتى أقل منه. 
ما أنا بأقولك وارد، لكن إيه بقى اللي أقل منه ومين اللي وصل الأمور للنقطة دي!

قال: اكتشف أن هذه المدينة ملعونة منذ العام 2007 لسبب يعرفه. وربما يعرفونه جميعا، ولكنهم لا يفصحون. فمدينة تقع على راس قضية كبرى ،جوهرة ملعونة، وكان مخطط الانقسام والخراب الصهيوني، مع ثالوث الشر نذير شؤم ولعنة عليها وعلى نفسها وعلى من يسكنونها؛ لا شيء يمكنه أن يزح تلك اللعنة عنها إلا العدل.

و هناك من يصِر بغباءٍ وعنادٍ على الاحتفاظ بالسلطة للأبد مهما كان الثمن الذي دفعه الشعب المغلوب على أمره ولايزال؛ الغريب بقى والمُدهش والمُؤسف والمُخجل أن موالسة الخراب و السادة اتحاد ملاك القضية لسه بيتخانقوا على من سيُدير قطاع غزة والضفة! أظن خلصت كده خلاص.


قلت له : حضرتك مش محتاج تكون محلل سياسي ولا خبير ستراتيچي علشان تفهم اللي حصل واللي بيحصل واللي لسه حيحصل، أنت محتاج قدر من التعقل والمنطق وقدرة  على مواجهة النفس بالحقيقة التي قد يصعب عليك تصديقها.

كل ماحدث طوال السنوات الماضية من صراعات على السلطة والنفوذ بين موالسة الخراب و أتحاد ملاك القصية من أول  يوم في تنفيذ مخطط الانقسام والخراب الصهيوني. ومع دجل المأجورون، أقول إن كل ما حدث كان مقدمة لا بد أن تصل إلى هذه النتيجة. ومش عايزك تستغرب ولا تزعل نفسك، ماتش المحرقة زي مخطط الانقسام والخراب كله كان متباع يا شاطر ..والله متباع
مش عايز تصدق براحتك بقى.

فقال: الوطني الحقيقي بيجي في وقت الأزمة عكس المذكورين. البلد بوجود موالسة الخراب واتحاد ملاك القضية عمرها ماتكون قايمة على حيلها...الشعب مش صالب طوله، وليه تبقى الناس قبل المحرقة في حالة انقسام و رعب وخوف وقرف، ما تخدم وتكافح  يا سيدي زي أي حزب محترم؛ وعلى أي حال  انتهينا يا سيدي...الدنيا وقفت في الاتجاه المعاكس، وحضرتك مش لازم تسيبها على جثتك أو جثة البلد...ومش لازم تتعزل وتسرح مع شعبيتك، وشعبويتك طافحة على الكل، أو تتنفي وتتنيل. عيب كدا...احنا بني آدمين مش في جبلاية القرود الشمبانزي الأقوى يركب العشيرة..!!

قلت: سبق وقلنا إن صراعات الوجود أو التي تحولها أطرافها لصراعات صفرية لا بُد أن تنتهي ببقاء الأقوى.. الأقوى فقط. هذه نقطة ليست محل نقاش أو مجادلة.
فقال: مش وقت البكاء على اللبن المسكوب.
قلت له: طيب روح هات لي كباية لبن غير اللي راحت وأنا أبطل بكاء..أوعدك.