غزة الحافية .. فيها مافيا....!! ( توفيق الحاج )

غزة ... أم النكبات... أم المتناقضات... فيها العجب  من شعبان لرجب ...وفيها النكت للي اشتكى واللي بكى واللي سكت .. غزة حاكورة مسورة على 2مليون مقهور بالاسلاك الشائكة والمعابر المغلقة والشعارات الكاذبة  ومحاصرة بالهموم والميركفا  والميليشيات  والزنانات والطوربيدات.. فيها الفقارا والحيارا والامارا والعبيد... وكله عايش والله يزيد .. بس عيشة عن عيشة تفرق... يعني عيشة الهباب مش زي عيشة الكباب وعيشة سبعة في اوضة مش زي  عيشة  مدام الوزير ع الموضة...يعني فت العدس في خص  نص نص..مش زي  الاوزي و لوكس الشاطئء وزعامة تبوس ..كاميرات  تصور والكل يبص.. والجندرما  تعص وتقول هص هص!!

 حق فردة صندل فرنسي لزوجة زعيم مسئول  بيطعم عيلة مستورة  طول السنة حمص وفلافل وفول.....!!

فنطزية عرس واحد لابن رجل اعمال من العصابة.. بتبني عشرة بيوت  ادمية  لاناس نسيهم الواعظ في زخم  الخطابة وتذكر بس حكم الطهارة من الجنابة..!!

في غزة العزة.. اينما وليت وجهك.. تجد مافيات.. مافيات..طفيليات حلابة..تتسلق على ظهور الغلابة وتمتص  دماءهم بطريقة مشروعة..والطرق كلها سالكة وغير ممنوعة..وكلمتها مسموعة..طالما الموالي يدسون  بالشمال في يمين مولانا الوالي..!!

 مافيات على كل شكل ولون ..  *مافيا سياسية..من الزعامات والقيادات  والحكومات والوزارات تدير التصريحات والمناكفات والمماحكات ولعبة خد وهات...!! في النهار ...طخ على بعض ..وتخوين وتعميل  وبزنس عيني عينك مع اسرائيل...وفي الليل بيسهروا مع بعض وتبادل احضان وابتسامات ونكت طازة ع الشعب اللي مات..!!

*مافيا اقتصادية من كبار رجال الاعمال  وشركات الاعمار  التي لم تعمر شيء..وانما قدمت لنا  احدث صيحة من الكرفانات.. سحلب في الصيف وبوظة في الشتا... يااااا مهون ايام  الخيام والقرميد ... احن على المدمرين المنيلين من لسع الحديد.. حتى كيس الاسمنت المدعوم  اشتروه...وباربع اضعاف السعر باعوه....والناس بتشكي وتولول ياخلق ..ياهووووه ..بنصدر ملفوف ع روسيا   وع اسرائيل البندورة والخيار ...واسعارهن  في سوق الثلاث  نار يا حبيبي نار..!!

*مافيا اتصالات من فريق شركات عال العال تحت قيادة الكابتن جوال ..بتبيعنا الهوا بحملات فورية وحزم نت وفيس ياعنيه ...ونازله علينا فواتيرشهرية.. وبترضي ع الجنبين عباس وهنية..!!

* مافيا اعلامية.. من اذاعات وفضائيات ووكالات.. اشي  ديني واشي وطني واشي شغل هيات .. صوت الزير وصوت جساس  واللي ضايع صوت الناس...الله وكيلك ..كله عدس ان كان  حب واللا  مجروش ..كله قاري ع شيخ واحد.. نفس الخطاب   نفس الدفتروالكتاب (حلق حوش..ولم قروش.) ماحب ماعليهم يستشهد حد...تلاقي حرب التحرير اشتعلت والعزم اشتد.. نفير وتكبير وعزق حجار من بعيد لبعيد... وغزة اليوم في عيد.. وبعدين ننسى مع برشلونة وريال مدريد ونتعشى فته حمص والحسرة على اهل الشهيد..!!  والحال هو الحال ومافي اشي جديد..مجرد دكاكين اف ام بايرة بتبيع فشة خلق..لناس حايرة من سلطة جايرة.. بيستهبلوا المواطن وبيعيشوا ع الاعلانات (سيبك من نت الجار..وخليك ظلك حمار) و(  اذا بدك تعيش في الجنة هناك.. اتفسح في الشارم بارك)..!!

*مافيا تعليمية...من الابتدائية  للثانوية... للجامعات  وهي كما الجامعة العربية.. اااخر الترتيب في ذيل الجامعات ..تتفنن  بفرض رسوم التسجيل والساعات.. بالدينارشرطا  وقد تبخرت القروض والاعفاءات..بينما لايجد الغلابا  حق ربطة البيتا 7  شيكلات  ..!! وتمر السنوات  الحلابات   لنرى خريجا نصف جاهل  لاتربية ولا اخلاق في زمن الفهلوة  والنفاق.. حاله يارب كما خلقتني ..مالا وعلما وحظا .. ليس له محل من الاعراب.. يصطف في طابور البطالة المترمل  الطووووويل في انتظار وظيفة مستحيلة  وزواج اكثر استحالة...فيلجأ اما للعمل في الباطون في رابعة النهار اوالسرقة او يستلهم البوعزيزي ويشعل في نفسه النار..!!

* مافيا اجتماعية.... من منتديات وملتقيات وجمعيات  ان جي اوز ....زي المانجة وزي اللوز ...جمعيات خيرية بتصحى وتنام ع ظهور الايتام... وجمعيات  اكسسوار عن المراة وكله تمام ومؤتمرمسلطن عن الشباب  احلى مافيه المشاريب.. وغدا مجلتن..وقول ياسلام ..

 غزة مولد وصاحبه غايب .... اللي بيحضر يعلا ويكبر

واللي مابحضر مهلوش نايب .... اما عجايب..!!