غزة بعد الطوفان، رسالة الى ترامب؟

ياعم ترامب، بيقولوا عليك بتاع صفقات، يعني تاجر شاطر، يعني بزنس مان
لكن واضح انك في موضوع غزة فاشل ولا مؤاخذه ياعم ترامب، مش شاطر
مش انت بدك غزة، صحتين وعافية
مش انت بدك تهدها، تكمل هد نتنياهو، وتعاود تبنيها، كويس
طيب يا اهبل في التجارة ولا مؤاخذة ياعم ترامب، ليش ما اخذتها قبل ما يقتل نتنياهو اهلها بسلاح من مصانعك، أتخذ مدينينة بنيت على جماجم الاطفال؟ ماذا تفعل بها؟!
سؤال آخر ولا مؤاخذة ياعم ترامب، ليش بدك تهجر اهلها، خليهم وخذهم فوق البيعة وببلاش كمان.
انت مش بدك صنايعية وعمال، احسن عمال وصنايعية بتلاقيهم في غزة
مش بدك سواقين وفنيين وأمن وووو.... كله موجود في غزة
مش بدك مدرسين يعلموا اولاد العمال والصنايعة، موجودين في غزة
مش بدك دكاترة عشان تشغل المستشفيات، موجودين في غزة
مش بدك كتاب ومحللين سياسيين يهزوا رؤوسهم ويحللوا زي ما بدك، موجودين في غزة، هي الجزيرة أشطر منك؟
مش بدك مراسلين وصحفيين بدون ضمير ولا ذمة، موجودين
ايش ما بدك موجود وعلى قد ايدك؟
بعدين انت مش عارف هذول بيشتغلوا بأقل الأسعار، من 17 سنة وغالبيتهم عايش على 100 دولار العمادي، بدك الف واسطة عشان ينحط اسمك في كشوفات العمادي
وغالبيتهم عايش على كابونة الجمعيات الاسلامية وغير الاسلامية، بدك توصية من أمير الجامع حنى يطلع لك كابونة تأخذها في النهار، كابونات الليل فقط للخاصة...
يازلمة قطعوا رجليهم على السلك عشان دولارات العمادي وكابونة الجامع.
ترامب، بدي اقول لك سر الأساتذة والدكاترة والموظفين عايشين على 50% من الراتب، والراتب بينزل كل شهر ونص
يعني باختصار بإيش ما أجا بترضيهم، ليش بدك تهجرهم وتدلل عليهم حتى تلاقي بلد تقبلهم
مين بده يقبلهم بعد تصريح المعتوه الصايع في تركيا وبيقول عنا قنابل موقوتة، احنا قنابل، احنا غلابة يازلمة!
لا مصر ولا الأردن ولا أرض الصومال ولا أرض الشيطان بتقبلنا بعد هذا التصريح.
بعدين ما تنساش احنا شعب هتيفة واللي بتجوز أمنا بنقول له ياعمنا، احنا بنتأقلم على طول وبنحكي انقليزي بسهولة وبنلبس كابوي وبرنيطة زي ما انت عايز
والله لنطلع نستقبلك في الشوارع ونرمي ورد على سياراتك، وحنعطيك شهادة تقدير مختومة بالاخضر والأسود، ونعملك مهرجان استقبال على شط بحر غزة، وانت تلولح للمشاهدين، هن بنات اليهhود احسن منك؟!
خلص خلينا على ارضنا وشغلنا عندك عمال بيش ما أجا، اللي بيطلع من ذمتك احنا قابلينه، بس بالله عليك ما ترحلنا عن غزة، احنا مش حنرحل من هالمخروبة!!! فاهم ولا لأ؟!
احنا بنحب هالمنكوبة وتعودنا عليها وتعودت علينا، احنا زي السمك، والله بننخنق ونموت اذا بعدنا عنها، برضيك انا ننخنق ونموت.
خلص خلينا في غزة وانت حر تعملها رفيرا ولا فيلادلفيا، احنا حنضل فيها ونسميها غزة.
فهمت ولا لسه، غزة مش طالعين منها ولو بتطلع ارواحنا.