غزة والشباب ومخالفات المرور؟!

ما معنى ٣٠٠ شيكل

٣٠٠ شيكل يعني شغل ١٥ يوم لسواق بيشتغل على سيارة بالاجرة

هذا السواق الشاب هو واحد من الاف الشباب من ابناء ال ١١ جيل الذين انتكبوا في غزة ويعيشون نكبتها المتواصلة ليل نهار

تعلموا ودفعوا مصاري لجامعات البزنس لما عميوا عشان ياخذوا الشهادة، نقعوها وشربوا ميتها بسكر او بدون سكر، ارتموا في الشوارع يسندوا الحيطان، بعد ان تحول نهارهم ليل وليلهم نهار، بيناموا طول النهار عشان ما يشفوش وجه حدا، ولا حتى وجه ابهاتهم وامهاتهم او اي مخلوق في الدنيا، وبيسهروا في الليل يذوبون هياما في عالم الانترنت الوهمي بحثا عن هجرة الى بلاد الله الكافرة، او بحثا عن امرأة من بلاد بعيدة تغريهم بمصاريها الكثيرة ليتجوزوها كمدخل للهروب من هذا الوطن العظيم.......؟!

يحاول هذا الشاب، الذي تعلم السواقة بعد ان تخرج من الجامعة، ان يتلقط رزقه ورزق عائلته التي دبسه بها ابوه حتى يحافظ عليه من الانحراف والدشارة

ويحاول شباب اخرين، من امثال هذا الشاب، ان يتلقطوا رزقهم من خلال العمل بياعين في الدكاكين ب ١٠ شواكل في اليوم او ان يعملوا بياعين متجولين، خضرة، كلور، براد، بطيخ، بيض وطحين مسوس،.....

غزة فش فيها شغل ، يا بياع يا سواق يا موظف يا من الثوار؟!

بالك مش احسن ما يضلوا يشتغلوا سواقي فرشات وركازين حيطان؟!

باعوا ذهب النسوان وقشقلوا ابهاتهم وحملوهم ديون وقروض "ربوية" من البنوك، موظف السلطة، اللي كانوا يقولوا عليه مستنكف وبيقبض من دايتون وعاملين حالهم اليوم خايفين عليه، كان بيصرف على ٣ اسر قبل ان يقشبروه؟!

شباب بدها الستر ...... احسن ما يصيروا دواعش، او مرضى نفسيين، او ينتحروا، او يشردوا على السلك، او يصبحوا فشك في سلاح الموت؟!!

شروا سيارات الرمش الحديثة، او عربات كارو او عربات زق، كل حسب مقدرة ابوه وذهب مرته

دخل الشاب اليومي بما فيهم السواق حوالي ٢٠ شيكل وان طارت تصل ٤٠ شيكل في بعض الايام

السواق بيشتغل من الفجر الى المغرب كل يوم، بروح السواق نهيان ، اعصابه تعبانة، وعنيه مغمضة، ويقاتل ذبان وجهه من كثر ما بيشوف ويقابل ويسمع،

السيارات تمشي بين الناس من الزحمة، عالم فوق بعض، لا في طريق ولا رصيف، كله زي بعض، هذا بخبط حاله في السيارة وهذا يزت نفسه قدامها، والنسوان لا يطلعن لا يمين ولا شمال وعيب يسمعن صوت الزامور، وكل الحق على هالسواق المنيل؟!

يا مصيبة السواق ان دهس واحد، يصير هو اللي معشي العيلة، ولازم يحضر السواق وعائلته المشحرة ١٠٠ الف شيكل "٣٠ ألف دولار"، عشان يتحول المصاب على اسرائيل، غصبا عن الاطباء والطب والقوانين، اللهم لا دواء الا في اسرائيل ولا شفاء الا على ايدي اليهود الاعداء الذين يدعي عليهم شيوخنا بالثبور وان يحصيهم الله عددا ويفنيهم بددا، في خطبة كل يوم جمعة تقربا الى الله واتباعا للسنة، شعب غريب؟!

الشرطة زي القدر في كل زمان ومكان، كل واحد حامل دفتر وقلم، بيقولوا الناس عنهم بدهم يلموا قبضة الشهر؟!

بيكتب المخالفه وهو يتلذذ بذلك كما يقول احد المعلقين، بيحلبوا الناس حلب، والله السيارة عليها 4 الاف شيكل شيكات ترخيص، مش قادر ادفعهم، وهم بلاحقوا فينا من شارع لشارع، يقول اخر، واخر يقول، الشرطي شايف حاله سلطان زمانه وعامل حاله مش سامع ترجايتك له بكل القيم والكتب السماوية، وهو بيكتب في المخالفة

ايش قصة المخالفات على الجوال، فجأة تصل السائق رسالة، عليك مخالفة، دون ان يدري او يشوف الشرطي؟!

طبعا، هذا غير الشواكل اللازم تدفعها كل يوم للمضمنين نواصي الشوارع والساحات العامة ومسمينها كراجات، يا بتدفع يا بتتبهدل، وجوه كشرة ما بتضحك للرغيف السخن، المهم تدفع شيكل

السيارات اكثر من الركاب، لذلك الركاب بيجخرطوا عليهم، والله ناقص يبوسوا ...... حتى يرضوا يركبوا معاهم

هموم الناس كثيرة، هذا بدفعش لانه معوش، وهذا بدفعش لانه كذاب، وهذا بنزل وبيشرد وبيقول دفعت، وهذا مادفعش وبدو باقي ما يدعي انه دفعه، وهذا بده فكة ١٠٠ شيكل عشان يدفع شيكل.......وهذه راكبة بالعرض، هي وثلاثة اولاد فوق بعض، وبدها تدفع اجرة راكب واحد؟!

قصص وخراريف طول اليوم، هذه بتسب على زوجها، وهذه مضروبة وحردانه، وهذه مبهدلة ومطلقة، وهذه متخانقة مع عمتها او سلفتها........هذا بيشتكي ابوه، وهذا بيدعي على اولاده وبسب اليوم اللي اتجوز فيه امهم وشافهم فيه، وهذا بسب على الحكومة والفصائل والشعب،....

دخل السواق اليومي حوالي ٦٠ شيكل، كم دخل السواق في الضفة او في دولة العدو اللي بتسماش؟!

٤٠ شيكل للسيارة وصاحبها

٢٠ شيكل للسواق

يعني السواق اللي بياخذ مخالفة ب ٣٠٠ شيكل حيحرم اولاده من النم ١٥ يوم

فش شيكل مصروف ل ١٥ يوم، وفش كيس شبسي ولا كباية برد بنص شيكل

ومش حياكلو دجاج جمعتين،

مرته حتصير تشابط وتقاتل في حالها مرة وفي زوجها مرات، ومرات بتفش غلها في ضرب الولاد، والولاد هيكرهوا ابوهم، وابوهم هيكره نفسه والدين والدنيا، والشعب والحكومة والمقاومة، والدنيا حتسكر في وجهه ويصير يشوفها من خرم الابرة زولات وظلمة، وهيك ممكن يعملها ........؟!!!

يا جماعة القانون كويس ولازم السواق يحترم القانون

لكن لازم القانون يكون رحيم

المخالفة هدفها تأديب السواق، مش تجنينه وعقاب اسرته؟! من هذه الفكرة يجب ان تنطلق فلسفة المرور والمخالفات المرورية، كما اعتقد

لذلك يجب ان تتناسب قيمة المخالفة المادية مع دخل السائق اليومي

عشان يكون لدينا قانون رحيم

وعشان السواقين ما يعملوهاش؟! حرام، والله حرام!!!!