فاتورة الدم وسؤال الوقت: إلى متى ننتظر في الخيام؟

بعد دخولنا بسنة ثالثة حرب ما شاء الله ،،
رسالتنا بدون تنظير وبالعربي المجربح يمكن يفهم البعيد، وعشان تفهم العالم صح حط براسك إن التعاطف بالغرب وخاصة باسبانيا مع الشعب وضد الإبادة، مش معك إنت كتنظيم بالعكس كل دول اوروبا حطينك بنفس خانة العدو وضد ٧ اكتوبر بالأساس، وهاد ظلم ومقارنة غير منطقية بوجهة نظرنا طبعًا، بس ما علينا نرجع لموضوعنا ؛
ما تنسى يا بن بلدي إن احنا كمان عايشين بغزة واسمع الناس، احنا مش بره بفرنسا ولا ببلجيكا أو تركيا، احنا موجودين يا باشا شايفنا ولا ايش وضعك؟ ..اسمعنا.. هاد صوت الناس اللي خجلانه تحكي لان المعركة معركة الجميع، بس القصة صارت خاصة شايفها وسلاحك كله ما منع الإبادة الجماعية عنا بالأصل، ما بنطلب منك تسلم سلاحك للعدو لا سمح الله وما بنرضاها على فلسطيني، لا ياسيدي بس ممكن تجمده وتسلمه لوسيط إقليمي مضمون، أو بإتفاق وتوافق داخلي فلسطيني مثلا، إنما تحصرها بوجودك كتنظيم وحكومة وموظفين وخوفك من بكره، لازم تفهم إن فيه ثمن يا عزيزي لسوء التقدير الاستراتيجي، اما بخصوص تنظيمك بطمنك "الفكرة ما بتموت" وإنت مستحيل تنتهي، بس "اعمل مراجعات وهاد لازم وضرورة ملحة" وكون حزب سياسي وادفع فاتورتك وخليك بالصورة، على ما اظن الشعب والقضية أهم من تنظيمك النسخة القديمة، لأن الشعب كله دفع الفاتورة وقدم دم مثلك وكل ما يملك وما حدا بهاي النقطة بيزايد على حدا.
والسؤال للي سايق : وبده إجابة ومن غير ما نخوض بالإختلافات والسفسطة المتعبة، لأنه ما فيه فايده من النقاش خدها مني! لاننا مش هنتفق ولو بعد 100 قرن مناكفه.
يا حكيم : اتخيل معي فقط لو تركونا "المغضوب عليهم" لسنوات قادمة أكثر بالخيام، وحصرونا بها النتفه بالمواصي، وإنت سيد العارفين طبعًا إن معهم نص غزة اللي خلوها غزة برضه بس الصفرا، وسابونا هيك بدون حلول للمآساة، وبدون إعادة إعمار، وبها الخنقة والتلزيق والحصار، ويمرجحونا مره جوع ومره شبع، وبعدها يسلمونا للتجار الفجار تا يسحبوا المصاري من جيبة المواطن، ويرجعوه للسحل من تاني على اسفلت الجوع ودايره دايره، على شوية ازمات فكه وسيولة، على لصوصية جحافل المناديب والمبادرين الا من رحم ربي، كل هاد وما فيه مصادر دخل بالأصل لمعظم الناس، يعني فيه ناس ما شافت إلا الجوع وما قدرت تشتري الشبع، ومع أمراض نفسية ومجتمعية لا تعد ولا تحصى في التنشئة، واكيد لو طولت قصتنا هتهدد الوعي الجمعي للناس مستقبلًا، وهتأثر على سلوك اجيالنا الجاية "المعتمدين عليهم كلنا" كحملة راية لشعب صاحب قضية تحرر وطني! 
فكرك هنتحمل قديش وحياة شرف حضرتك لوقتيش؟ 
ومش ماديًا بس يا سيدي لا وصحيًا كمان، ومثلًا لا حصرًا: عندك الحالات المرضية الصعبة اللي بتخرج بالقطارة للسفر ومعظمهم بيموت وهو مستني دوره، وعندك كمان كارثة الحياة الإنسانية بغزة اللي بمشاركة ورعاية القوارض والبراغيث والزواحف، و كل هاد بمنظومة صحية مهلهله ومدمره صار الداخل فيها مفقود والخارج مولود ...!
معلش طولت عليك عارفك مش مقتنع اصلًا ومتضايق إننا حتى بنحكي ونشكي.. بس فكرك واعيد السؤال عارفك مطنش أهلنا كلنا من زمان؛ ونعيد من تاني قديش وقت كمان ممكن يتحمل الشعب؟ ولا فكرك ممكن ينقرض الشعب أو يهاجر مثلًا؟ ياريت تطمني يمكن تطلع إنت الوحيد الفهمان فينا واشطر ولاد صفك واحنا ظالمينك.؟!