كثر النق بيجيب الفقر ..

ايام زمان كان في دكانه وحده في الحاره بتبيع بندورة وخيار وكاز ودوا غسيل وشوية معلبات وسمنه وسكر ورز ومصاص وعلكه ودخان فرط ودخان هيشي ودفاتر لف ودفاتر مدرسه وعلب سردين وزيت زيتون بالوقيه وسمنه فرط وما شاء الله البياع لابس مريول ما تقول غير منيو الدكانه عليه زيت وريحته كاز وسمنه وبصل وكله عل دفتر الكل بشتري وبيروح وبعدين بيسجل لما يتذكر ..الكل مبسوط صاحب الدكانه وأهل الحاره ومن خلال العشره صار يعرف كل نسوان الحاره وكل بناتها وكل لولاد بيعرف ميم حامل ومين عندها مشكله مع جوزها ومين تطلقت ومين بدها تتجوز ومين اجاها عريس كل اخبار الحاره في الدكانه واجتماع العصر ختيارية الحاره كل واحد وعكازته بيشرفوا وبيقعدوا على باب الدكانه وبيستعرضوا شو صار وشو الاخبار وهات يا نميمه وفلان وعلان ومرت فلان ما بتقعد في الدار طول نهارها دايره ومرت فلان مبذره يا زلمه مبارح طابخه طبختين الله اكبر لا ودار ابو فلان سمعت بدهم يشتروا تلفزيون مهو بعيد عنكو لما بيكون الزلمه هامل والحكم للمره بيصير اكثر من هيك ..

سمعت خطاب عبد الناصر لا والله ما سمعت فش عنا راديو ورحت عند ابو اسماعيل مشان نسمع سوا لكيت الراديو فش فيه بطاريه ورايح يسمع عند دار ابو ابراهيم..

ليش شو قال يا زلمه ٣ ساعات وهو يحكي بدك اياني اقولك شو قال ...قوموا نرجع قرب المغرب نصلي ونتعشى بيكون اذن لعشا وننام ...

واحد من اللي كاعدين بيراقب الدكانه كم واحد فايت وكم واحد طالع وقديش بيبيع يعني في هل ساعتين باع اقل شي بليرتين طول النهار مش اقل من ١٠ ليرات قول بيربح ٢٠ قرش في الليره بيطلع ليرتين في اليوم يعني ٦٠ او ٧٠ ليره في الشهر احسن من ٢ معلمين مدارس هل هامل بيطلع ...

صاحبنا عنده شحط ساقط في الصف السادس رجع الدار راسه مليان وبعد العشا اسمعوا تكلكوا خير يا حج شو خير ان شاء الله 

بدنا نفتح دكانه للساقط بنقسم غرفة الوكاله وبنوسع الشباك وبندق  اكم رف وانا معي ٢٠ ليره بنشتري فيهن أغراض للدكانه والساقط بيقعد فيها كل يوم بيبيع ب ٢٠ ليره بيربح ٥ ليرات في الشهر ١٥٠ ليره شهرين ثلاثه بتشتري ٣٠٠ متر على الشارع لآخر السنه بنبني عليها ٣ مخازن وطابقين فوق والسنه الجايه بنروح انا وامك عل حج ...

طيب انا بدي دشداشه ومسبحه يابا انا بدي حرام يابا انا بدي فرد بيضوي....

طلعت دكانة الساقط زي  احلام 

قادة الامه في الوحده والنهضة ..

بعد شهر من فتح الدكانه سكرت وطلع مديون ب ١٠٠ ليره صالح الساقط اكل الحلاوه ولملبس ووزع عل ولاد ببلاش ونسى يسجل عل دفتر وصار هو وابوه مضحكه في الحاره ...

هو كل من قال بفتح دكانه بيصير بقال !!!!