كنعان ولعنة الانفصام -الجزء الخامس

كنعان في عيادة الطب النفسي

يوميات ابو العبد وأم العبد

كعادته الصباحية اليومية
وعلى أنغام أغاني فيروز،
ذهب أبو العبد إلى شرفة المنزل،
لحقته أم العبد بالقهوة،
،،،
حضر حالك اليوم بدنا نروح السوق،
البيت فاضي بدنا أغراض كثيرة،
،،،
يا بنت الحلال ما ظل من الراتب شيء،
الشهر هذا استلمنا نصف راتب،
ما تقدري تصبري أسبوعين،
،،،
لا تهتم، مر علي سليم وهو رايح الشغل،
الله يرضى عليه، حط بجيبتى خمسماية شيكل،
وظل من راتبي التقاعدي ثلاثماية شيكل،
طيب أنت كم ظل من راتبك؟
،،،
ظل ميتين شيكل الله وكيلك،
على فكرة، صاحبي أبو زياد طلب يمر علينا اليوم،
هو وابنه زياد وزوجته،
،،،
خير شو في عسى ما شر،
زمان ما سمعنا عن دار أبو زياد،
،،،
ان شاء الله خير، بدهم يخطبوا لزياد،
ورايدين القرب منا، بدهم يشوفوا نسرين،
،،،
شو بشتغل زياد؟ أظن هو تخرج هندسة من سنتين،
أنا معلوماتي انه قاعد من يوم ما تخرج،
مثله مثايل من هالشباب المتخرجين،
،،،
اشتغل في بنك بقسم الصيانة،
اشتغل بالواسطة،
أنت عارفه عمو ضابط كبير بالأمن الوقائي،
،،،
لا لا يا أبو العبد شغل البنوك حرام،
وأنا ما بقبل بنتي تعيش بفلوس حرام،
اعتذر لأبو زياد،
،،،
اسمعي، أنت عقدتي البنت،
وقطعتي نصيبها اكثر من مرة،
مرة هذا بدخن، ومرة هذا مايع وأمه كاشفة شعرها،
ومرة هذا بشتغل في الأمن الوقائي،
تنسيق امني مع الصهاينة،
خلاص بكفي، أنا بدي استقبلهم وعلى مسؤوليتي،
يعني البنت تعنس من شان خاطر افكارك الملخبطة،
كلنا مجتمع واحد وتحت الاحتلال،
ما حد احسن من حد، وأولاد حلال،
والخير والبركة فينا ان شاء الله،
،،،
على مسؤوليتك أنا ما خصني،
،،،
ولازم تدخل كاشفة شعرها،
مثل ما دخلتي علينا يوم طلبتك،
بتتذكري لما دخلتي كاشفة شعرك ولابسة تنورة،
يعني حلال عليكي وحرام على بنتك،
صدقيني يومها لو دخلت بالنقاب،
مثل اليوم ما كنت تزوجتك،
،،،
طيب تأخرنا على الخضرة،
سليم ترك مفاتيح السيارة،
راح اليوم مع سواق الشركة، عليه جولة بالمشاريع،
،،،
شوفي يا أم العبد إذا بدك تروحي معي لا تروحي بالنقاب،
البسي ايشارب، وإذا ما عجبك سجلي الأغراض على ورقة،
يابنت الحلال قربتي على الستين،
،،،
طيب اسبقني على السيارة وبصير خير،
،،،
ركزي معاي، ترى أنا بحكي جد مش مزح،
،،،
جاءت أم العبد على استحياء تلبس الايشارب،
كانت مترددة تقدم رجلا وتؤخر اخرى،
كأنها مقتنعة، لكن تقيدها عادة اعتادت عليها،
،،،
صاح أبو العبد ؛ ايوه فكي هالقيد،
فصمتينا، الله يفصم اليهود ان شاء الله،
،،،
ركبت أم العبد، وانطلق أبو العبد مبتسما،
ادار مفاتيح السي دي،
فإذا بعبد الحليم حافظ يغني أغنية احبك،
يا عيني يا قلبي جرى ايه،
الدنيا حلوت كده ليه،
يا حبابي يا اهلي يا جيراني،
أنا عاوز آخذكم باحضاني،
وكان منسجما يردد كلمات الأغنية،
،،،
يا زلمه فضحتنا الصوت عالي،
وطي الصوت والله ابنك استحى يعمل هيك،
،،،
بتتذكري يا أم العبد،
كم مرة رحنا السينما وحنا خاطبين،
والله أيام كانت حلوة،
حاسس حالي إني رجعت شباب،
برمت شفتيها وقالت ببرود،
،،،
بتذكر كيف بدي أنسى يا أبو العبد،
دير بالك، لا تيجي طريق المستوطنين،
هذول قطعان خنازير برية،
فلتوهم علينا، وحوش، لا إنسانية ولا أخلاق،
روح على محل الخضرجي أبو صالح صاحبك،
،،،
وصلا إلى محل أبو صالح،
،،،
أهلا وسهلا بأبو العبد وأم العبد،
وين يا أم العبد هالغيبة الطويلة؟
،،،
والله ظروف يا أبو صالح،
،،،
استفرد أبو صالح بابو العبد،
يا أبو العبد مين المنقبة الي كانت تيجي معك،
ليكون تزوجت وما حدا داري،
،،،
اعوذ بالله يا أبو صالح، أنا اتزوج على أم عيالي،
هي نفسها أم العبد كانت منقبة،
اختلفنا بالرأي فترة،
وان شاءالله الأمور رجعت لمجاريها،
،،،
بفهم من هيك انها صارت حمساوية أو جهاد،
،،،
حتى لو صارت مين ما يكون بتظل أم عيالي،
استوعبتها والحمد لله الأمور طيبة اليوم بالحوار وبالعقل،
،،،
والله يا أبو العبد اختلط الحابل بالنابل،
وصرنا بين حانة وبانة،
،،،
شوف الحساب أبو صالح،
اليوم كاس مش على الدفتر،
،،،
يا جماعة عندي عكوبات على كيف كيفكم،
شايلها على جنب الحبايب امثالكم،
لكن بدون تنظيف،
،،،
آفا يا أبو صالح، عكوب من زمان احكي،
وأنا شو صار شغلي بالبيت غير تنظيف العكوب،
وتقطيف الملوخية وحضور الجاهات بعد التقاعد،
هات العكوبات وضيفهم على الحساب،
،،،
العكوبات هدية مني لحبيبي أبو العبد،
رفيقي في قيادة الانتفاضة الأولى،
،،،
والله ختيرنا يا ابو صالح وما انجزنا الاستقلال،
البركة في أولادنا ان شاء الله،
إلى لقاء اخر