لم يكملوا المنهج ويتقاضون راتب عشر سنوات

في بلدنا طزلو زي حيالله شيء والحبل عالغارب

أعضاء التشريعي شيء بيفرح لا في العير ولا في النفير لا بيعرفوا تشريع ولا حتى قواعد النحو والصرف واللي بجلطك لا بيعرفوا سياسة ولا ليهم علاقة بالنيابة اللي حصلوا عليها في سهوة بحر وتزوير وعي الجمهور وشوية همبكة في الزمن الغابر وامتدت صلاحيتهم رغم انتهاء الشرعيات للزمن الأغبر.

عندما انتحبوا في يناير 2006م الطوشة ولعت في البلد ولا تعلموا تشريع ولا سنوا قوانين ولا راقبوا سلطة تنفيذية ولا تحدثوا مع جمهور اللي هم نوابه فيهم اللي غاب عن البلد وساكن برة ومنهم اللي كبر مشاريع الولد ولا من شاف ولا من دري ظابسين في الذرة لأحسن حدا يشوفهم وما إلهم دعوة باللي صار واللي جرى وبيشتغلوا في أشغالهم السابقة رغم إنو ممنوع.

يقارب الوقت على انتخابهم عشر سنين بعد أيام والحالة تعبانة يا ليلى صلح مفيش ووحدة مفيش وطزلو وحيالله طمعانين تصير انتخابات جديدة ينزلوا فيها ومبسوطين عاللعبة راتب من غير عمل ولا مسئوليات ما هي سايبة لا سائل ولا مسئول.

طيب يا جماعة الخير شو عملتوا ممكن حدا منهم يقول والله مش احنا المسئولين عن اللي صار طيب منيح بس وين دوركوا ما حدا سمع صوتكوا ولا حدا عارفكوا أصلا لا يا سيدي بتقدروا تعملوا كل يوم مواقف وخاصة انكوا ممثلين عن الشعب لكن شكلكوا مثل المسئولين الآخرين بدل ما انتو ممثلين الناس انتو بتمثلوا على الناس لإنو جيابتكوا كانت غلط.

تسمع للواحد فيهم يا أخي بتحس بظلم الأيام ليش وكيف ومين اللي حطكوا في هالمكان مش حرام تاخدوا راتب عشر سنين وانتو ما كملتوا المنهج النائب أصلا بيكون حريف سياسة وقوانين وبيقعد فترة لما يعرف شغل التشريعي علشان ينتج للبلد شيء وانتو لا حريفة سياسة ولا قوانين وما لحقتوا تتعلموا وهيكوا بتقبضوا راتب ما شالله وجوازات وبدلات ومشاريع وشغل لفتك ما لفتك وبتضحكوا عالناس وعلى مصايبها دون عمل والله عيب يعني إذا هادول اللي قسموا البلد وخربوها تبعين السياسة بنقول عليهم زفت ودمرونا طيب شو نقول عليكم وانتو لا حس ولا خبر .

يللا مهو أظرط من الخال إلا ابن أخته ما انتو كمان وليد النظام البائس وكويس انكوا ما اشتغلتوا في التشريع وإلا بهيك قدرات وتصرفات كنتو راح تجيبونا طيز ابريق وتخربوا التشريع كمان ربك رحيم يعني دمار أقل من دمار شامل كويس والله يا شيخ انو التشريعي متوقف لإنو الأيام العويصة كشفت قدراتكو وتقاعسكوا.

يللا يا شعب قابل للانخداع في كل مرة بكرة بيضحكوا عليكوا وبتنتخبوههم كمان مرة لإنهم غلابة ما أخذوا شوطهم كامل مهي مرجيحة وانقطع شوطهم كهكهكهكهكه ولازم ياخدوا شوط جديد ..

ولا واحد تنتخبوا منهم يا ناس هدول كان بإيديهم يعملوا الشيء الكثير في محنتنا على الأقل لو عندهم انتماء لاستقالوا كلهم وفرضوا انتخابات جديدة غصب عن المنقسمين وبظلش للمنقسمين حجة الشرعية لإنو بيصير في فراغ تشريعي ما حدا راح يقدر يواجهه إلا بمصالحة وانتحابات جديدة الله لا يسامحكوا في اللي أخذتوا بدون عمل وكان ممكن توقفوا كتير من خسائرنا ودمنا ودمارنا والمناصب مختبر الرجال لو كان في ....