صابتك وعكة صحيّة, مش حاسس انك تمام, في اشي كاتم ع نفسك, معدتك بتصوِّط و بتلعب مصارعة جواك, راسك مصدع, صابك ضغط من وضع البلد,أو حالة ولادة طارئة من كتر الطق و النق, او مرارتك انفقعت من كتر الفري و الهري في حالك, او الزايدة عندك ملتهبة من اكل الفلفل مع القرف, او اجاك السكر مع خطابات الشسمهم, او انعمى ضوّك عادي , طبعا وين حتروح المفروض ع مكان نضيف, مرتب, معقم, في ناس ولاد حلال اسمهم دكاترة, و بنات حلال اسمهم ممرضات, و غرف مرتبة و نضيفة و التهوية فيها اعلى ما يمكن, و أول م تدخل هناك ما عليك إلا انك تاخد رقم و تستنى دورك لما ينادي عليك الممرض او الممرضة الخاصة فيك عادي بتدخل مرتاح البال, بغض النظر عن الألم الجسدي الي صايبك, بتدخل لو لابس جاكيت بتشلحه و بتحطه ع الباب ما انت عارف المستشفى هاي من أرقى المسشتفيات في العالم العربي أجمع, و بتقعد ع الكرسي و هي بتقعد وراء مكتبها ع الكمبيوتر تبعها ما انت برضو عارف انه موجود في هاي المستشفى اعلى و اذكى طرق حفظ البيانات للحفاظ على سلامة المرضى, و يدور الحوار بينكم ك الآتي :
الممرضة: مرحبا فيك يا أستاذ تفضل احكيلي اسمك و عنوانك و بيانتك الشخصية !
"ترا مش تحقيق بس لسلامة المريض و توصيل نتيجة الفحوص في البريد اله"
المريض: اهلين فيكي "كح كح" انا فلان الفلاني, عنواني : الزقاق رقم "*" و رقم البريد "*****" !
الممرضة: "بتكتك ع الكمبيوتر و بتكتب البيانات" اه يا اخ اتفضل من ايش بتشكي ؟
المريض: ضغطي بيعالى لما اشوف التلفزيون بالذات قناة الاقصى و قناة فلسطين, و حرارتي بتعلى بس اسمع اسم "الراتب" و بيصيبني مغص كلوي حاد جداً لدرجة اني من العتمة قصدي من الوجع بخبط في راس ابني و هو نايم ع الارض لما الكهرباء تقطع, وسكري بيعلي لما بتيجي سيرة المعابر, و صوتي بينبح من " التريد مارك الغزاوية" كل م بنزل ع الشارع و بسمع حد بيحكي في السياسة, و مرارتي بتنقح عليا كل ما اسمع انه في كان في مصالحة, و اسمع كلمة حكومة وحدة وطنية مضحوك علينا فيها, و يييي كثير شغلات !
الممرضة: حنعملك التحاليل اللازمة و نبعتلك النتيجة ! " مع ابتسامة بتبيّن سنانها البيض, و طبعاً ريحة تمها و هي بتحكي نعنع مش بصل او تومة" !
المريض: قولتك بطيب يعني ؟
الممرضة: اكيد طبعاً يا استاذ لكل داء دواء عشان هيك سمونا مستشفى البلاء قصدي الشفاء !
المريض: الله يسعدك شكراً كتير منتظر نتيجة التحليل
بعد يومين وصلته النتائج و كان مكتوب " استاذ فلان الفلاني العزيز اذهب الى الصيدلية و ستجد هناك "الرُشِتة" و اشتري الدواء المذكور بها و عليك بالعافية" ! للي عندهم فضول يعرفوا الدواء, كان "عليك بالتحدث الي الشسمهم لانهم هم الطريق الوحيد للبلاء قصدي الشفاء" !
طبعاً الي بيشكي من اي اشي يروح ياخد تاكسي ع مفترق ابو طلال او يروحها مشي من جامعة الأزهر بضلك دغري بتلاقي التشريعي "اطفي سيجارتك على بابه و افتح وحدة جديدة و قول بصحتك يا تشريعي" بضل دغري بتلاقي رمزون ابو طلال و بعدها بتروح شمال ابو 70 متر بتلاقيها في وجهك !
ملحوظة: انا مش مسؤولة عن الاعراض الجانبية لزيارة المستشفى, يعني الي بيروح عنده انفلونزا بيروّح رجله مجبسة او ع القبر لا سمح الله انا مليش دخل ولا المستشفى و لا الحكومة هادا بس " قضاء الله وقدره" !
جميع الحقوق محفوظة لـ أمد للاعلام © 2007 - 2026
