مَعْبَـرْ !!

صادفت أوائل أكتوبر الحالي الذكرى الـ (826) لـ "فتح القدس" على أيدي الأخ صلاح الدين ، وبهذه المناسبة نتقدم للأمة العربيّة والإسلاميّة والاخوة أصحاب غزّة ، وأصحاب رام الله ، وأصحاب عُمري ، وأصحاب الفيس بوك ، وأصحاب "مكاتب التكاسي" والمكتب السياسي ، واللجنة المركزيّة للحجّاج ، ومحلات ساق الله للكلاّج بأحر التهاني والتبريكات ووافر الصحة "وويفر شومر" وبسكوت العودة في محافظات القطاع والحمدلله كلنا بخير والحكومة بخير ، والتنسيق بخير ، والبضاعة بخير ، والجماهير بخير ، والتهدئة بخير ، والتوغل برام الله وخانيونس والبيرة "زَبْزوب" قصدي "محدود" ، يعني بيدخُلْ وبيطلَع عَ السَّكِتْ من الحدود .. اسمع يا عبد الودود عليّ الطلاق من غزّة واسدود طريقك مسدود مسدود !! وحماس راح تفوز بالانتخابات الجّايه عَ ذمة أخونا أبو خالد الزهار بدون حدود ..! كوّيس يخو وطالما البنت موافقة احنا مش ضد مع إنّه ابن عمها كان بحبها لكن كل شي قسمة ونصيبْ ، ويابو مازن يا حبيبْ فاوضْ فاوضْ تل أبيبْ .! وبعرضَكْ تسألنيش عن "المصالحة" مع إنُّه في حكي عن عرض جديد ! بحكيلك "حماس" عَرَضت عَ فتح تأجير غزّة مقابل (99) أغورة للدقيقة الواحدة !! وشُفتلَّكْ هالوَحدة يفضح عرضها من سيارة راكب فيها عَ الخط ، والقدس خط أحمر مش "قلم روج" يا فالح ، صحيح البطيخ السّنة كان مالح الله بيستُرها يابو صالح ، بالله عليك تشتريلي معاك بكيت دخّان صدري مقبوض حاسس ومش حاسس ، بس فيه تنميل في الفصائل و"معاليقي" فايعين ، ومن سنين مش عارف أنام من صوت الماتور ، وبحكيلهُم طور بحكولي احلبوه ...!! بشرفك ضل حدا ما حَلَبْنا .. لسّه ضايل "مصر" والله ليحلبونا بعد ما كانوا يحبّونا ، بس الحق مش عليك ، الحق عَ فضائية القدس والاقصى ، وأقصى ما بخيلكْ اركَبُه ... وَلَكْ أنا مخلفَكْ عشان تكتُب و"إتبَعبصْ" عَ الكيبورد ، قوم اعملَّك اشي مُفيد ، شوف ما شاالله عليها "حماس" زَرَعَتْ وحَصَدَتْ .. كاتبَه عَ مدخل غزّة (هذا من فضل ربّي !) ، وربّي إذا بعد التسع شهور بتحكيلي مفاوضات يابو مازن لأزعل منّك ، دايماً مفاوضاتْ .. مفاوضاتْ .. نواشفْ .. نواشفْ .. فش سلق وعدس ! فش أخبار جديدة ، فش سبانخ .. فش خُرقي يا زلمة ، نازل من الصبح سياسة ، هلكتني فتح وحماس ، حماس وفتح .. يا أخي والله العظيم عارف فتح الثّورة . وفتح العاصفة . وفتح الإنتفاضة وفتح الاسلام وفتح الشيوعية وفتح أبو موسى وفتح علانْ و فتح دحلانْ وفتح أبو الرّيش .. بس احكيلي فتح المَعبَـر وقتيـشْ !!