هندي والنكشة العربية معي

ما بعرف شو صار معي ..كل الي بعرفة اني زهقانه وبدي انكش رأس مع حد، حسيت بتعب في جسمي شكله في ضغط لا مرتاحه مع هالاخبار ولا بهالدنيا ..حاسس حالي بدي اشوف بني آدمين مش بعرفهم . بجوز لسه  عندي نفس للضحك وحب الدنيا وانا مش عارفه.

لقيت هالهندي قدامي  اجه والله جابه حاله مبهدل وع باب الله شكله ما بده من هالدنيا غير هالستيره ع قولت الختايره ... ما لقيت حالي غير بحكيله هني هني من وأين طلعت هالكلمه ما بعرف ، الزلمه اطلع علي وصار يبرطم انجليزي ..ما زبطت معي كنت حابب اجرب لغة العالم وانا ما بفهمها زي غيري الكل بحكي ب لغة غيره وهو مش فاهمها والمصيبة بتزبط معه ..طيب خليني احكي ب لغة غير لغتي بجوز يصير عندي مهارة خربطت الكلام واللعب بالحكي بدل من الصراحة والهبل  .. ما علينا.

لقيته برفع بحواجبه وبحكي وبضحك زي الي بتغزل يا خواتي  .. قلت نكشه و اضحكت ما لقيته غير بحكي نكسة ... ما بعرف فرفشت مره وحده بجوز لاني اتذكرت فرحت شعبنا بس يصير عندهم عمليات وطنية وبصيروا يرددوا ويحكوا من غير ما يفكروا .. المهم سألني شو نكشه... قلتله بالانجليزي (fun) الله وكيلكم انبسط.. ذكرني بالفلاح الي داخل مدينه وفجأة بصير مثقف و فهمان وأهل بلده متخلفين وبصير يطلع عليهم  من رأس مناخيره لأنه أبو العريف.. ما علينا..

صار يحكي ويضحك مع حاله ويحكي نخشه .. اتخربط الزلمه قلت شكله سامع أخبار العرب اليوم وصار يتخربط مع وضع هالبلاد .. حافتني الصفنه وصرت اطلع علی ملامح وجه ..لقيت فيها حكي هندي مش مفهوم بس اتذكرت المحللين السياسيين وأصحاب الوسائل الإعلامية كيف بحللوا من غير ما يفهموا قلت يا بنت اعملي مثلهم .. صرت احكي عنده حواجب غليظه معناته هو بالأساس عنده روح الإجرام المخفي .. اطلعت علی توسيعت عنيه لقيت فيه براءة و وراها خبث الدنيا واطلعت علی شواربه لقيت فيها تعب الدنيا ببلاش .. قلتله بالعربي شو عامل بحياتك؟  ماهي اللغات صارت تنفهم بالشفايف .. الاهبل قلي نخسه وضحك .. يقطع شره صرت احلل معناها بعدها اتذكرت النكشه... واعرفت انه البني ادم شارب من شط غزة ومصر والأردن وسوريا وليبيا وتونس والعراق وووو.. ما علينا ...

أعطاني قلاده هنديه وقلي هاي الك.. حكالي بتجيب الحظ وانت عندك وجه كله حظ .. اضحكت وقلت ( نخسه) مثله .. شو قصة الحظ مع الناس .. يا الله بجوز حظي مع شوفتهم.. ما علينا.. اطلعت علی لقلاده لقيت فيها صورة فلوس ومزينه باشي غريب ما فهمته ومذهبه بالذهب.. ما بعرف ليه  ذكرني بالي بقدموا دعم مادي للشعوب والاعلاميين مقابل ينقلوا سياستهم حسب موجة التيار من غير تفكير ..  قلت والله شكلها هالنكشه خلت منه سياسي عربي فاهم كل اللغات ورح يوزعها علی عالمه حسب فهمه بعد ما قدم ذهب حسب قيمة جيبته.. بعدها تخيلت كلمة نكشه تتحول الی قضية إرهابية كل الامريكان والأوروبيين يعملوا حلقات دراسية يفتشوا علی معناها مثل الكلمات إلى بتم نشرها كأنه خبر عاجل زي الي بكذب الكذبة وبصدقها  .. قلت يا ويلي اتأكدي انه فهم لغتنا صح بلاش يكون دافعلي هالقلاده الذهبية مقابلها واصير إعلامية  استغلالية للمواقف والتيارات بنقل كلمتي بدون ضمير واصير من دعاء العروبة والوطنية بالاسم .. ناديته لو سمحت لو سمحت.. والا هو من بعيد بقلي نغزه ... يا لهوي النكشه ثم نكسه ثم نخسه و نغزه ... معناته انتغزنا وانقرصنا وخلصت حكايتنا لازم اندور علی لغات جديدة للنكشة يا عرب.. قلتله نكشه .. عصب وقلي اوكي اوكي .. قلت شوف هالبعيد لمسخمط عصب والله شكله خاف وفكرني بقله هات كمان قلاده... وإلا هو بقلي مسخطط .. قلت يا بنت اهربي ... الهريبه ثلثين المرجله في زمن مافي لا إرسال ولا استقبال بلاش انسخط هلا واصير  بمخ مذهب من غير تفكير ....